कौवाखोज। सुनसरीको बराहक्षेत्र नगरपालिका -४ कौवाखोजमा सम्पन्न कोशी प्रदेश स्तरीय अन्तर पालिका खुल्ला भलिबल प्रतियोगिताको उपाधि ईटहरी उपमहानगरपालिकाले जितेको छ। उसले उपाधि दाबेदार न्यु शिखर शुज ईटहरीलाई सोझो सेटमा पाखा लगाउँदै उपाधि हात पारेको हो ।

उसले शिखर शुजलाई २५-२२, २५-१६ र २५-२३ को सेटमा पराजित गर्दै उपाधि जितेको हो । जितसँगै ईटहरीले नगद ७५ हजार हात पार्यो। त्यस्तै उपविजेता शिखर शुजले नगद ५० हजार हात पर्यो । फाईनल खेलको म्यान अफ द म्याच विजयी टिमका बालकुमार रायमाझी भए ।

त्यस्तै बेष्ट सेटरको उपाधि  पराजित टिमका दमन उदासले हात पार्दा बेष्ट ब्लकरको उपाधि विजयी टिमका रुपेश कट्वालले हात पारे । त्यस्तै बेष्ट स्पाईकर पराजित टिमका रबिन गौतमले हात पार्दा बेष्ट लिबेरोको उपाधि पराजित टिमकै संतोष राईले हात पारे ।

त्यस्तै प्रतियोगिताको सर्वोत्कृष्ट खेलाडीको उपाधि विजयी टिमका प्रविन कट्वालले हात पारे । प्रतियोगिताको विजेता तथा उपविजेतालाई प्रमुख अतिथि बराहक्षेत्र नगरपालिकाका प्रमुख रमेश कार्की, विशिष्ट अतिथि पूर्व अन्तर्राष्ट्रिय भलिबल खेलाडी जय नारायण चौधरी, कोशी प्रदेश भलिबल संघका अध्यक्ष खेम राई, आयोजकका अध्यक्ष रोशन कट्वाललगायतले पुरस्कार वितरण गर्नु भएको थियो ।

राष्ट्रिय खेलाडीहरूले समेत सहभागिता जनाएको यस प्रतियोगितामा कोशी प्रदेशका दुई विभागिय टोलिसहित १० टिमको सहभागिता रहेको थियोे । ३ गतेदेखि संचालन भएको यस प्रतियोगिताको आयोजना खेलप्रेमी युवाहरूको समुह नव ज्योति समुहले गरेको हो ।