दुबई। यहाँ जारी ट्वान्टी-ट्वान्टी विश्वकप क्रिकेटमा इंग्ल्याण्डले उत्कृष्ट प्रदर्शन गर्दै जित हात पारेको छ। उसले अष्ट्रेलिया माथि ८ विकेटको जित निकालेको हो। टस हारेर ब्याटिङ गरेको अष्ट्रेलियाले प्रस्तुत गरेको एक सय २६ रनको  सामान्य लक्ष्य इंग्ल्याण्डले ११ ओभर ४ बलमा पुरा गर्यो।

उसको जितमा जोस बटलरले अविजित ७१, जसोन रोयले २२ तथा जोनी बैरस्टोले अविजित १६ रनको योगदान दिए। बलिङतर्फ एडम जाम्पा र एष्टन अगरले एक/एक विकेट लिए।

यसअघि टस हारेर ब्याटिङ गरेको अष्ट्रेलियाले अन्तिम बलमा सबै विकेट गुमाउँदै एक सय २५ रन मात्र बनाएको थियो।

उसका कप्तान आरोन फन्चले ४४, एष्टन अगरले २०, म्याथ्यु वाडले १८ तथा मित्सेल  स्टार्कले १३ र प्याट कुमिन्सले १२ रन जोड्न बाहेक अन्य दोहोरो अंकको रन जोड्न सकेनन्।

बलिङतर्फ अष्ट्रेलियालाई सस्तैमा समेट्ने क्रममा क्रिस जोर्डनले ३, क्रिस वेक्स र तिमल मिल्सले २/२ विकेट लिए। जितसँगै इङ्ल्यान्डले लगातार तीन खेलमा जित निकाल्दै ६ अंक जोडेको छ। उ समुहको शिर्ष स्थानमा छ।

दक्षिण अफ्रिकासँगै समान ४ अंक भएपनि अष्ट्रेलिया ३ खेल मध्ये २ जित र एक हारसँगै तेश्रो स्थानमा छ ।