दमक। झापाको दमकमा जारी प्रदेश स्तरीय अन्तर पालिका वडा अध्यक्ष कप भलिबल प्रतियोगितामा लगातार जित हासिल गर्दै दमक नगरपालिका, झापा गाउँपालिका र रामप्रसाद राई गाउँपालिका भोजपुर प्रतियोगिताको अन्तिम चारमा प्रवेश गरेका छन्।

दमकले कमल गाउँपालिकालाई  २५-१५ र २५-१३ को सोझो सेटमा पराजित गर्दै सेमिफाइनलमा स्थान सुरक्षित गरेको हो भने झापाले हतुवागढी गाउँपालिका भोजपुरमाथि २५-१९ र २५-१७ ले जित हात पारेको थियो।

त्यस्तै रामप्रसाद राई गाउँपालिकाले उपाधि दाबेदार मानिएको आमचोक गाउँपालिका भोजपुरमाथि उत्कृष्ट पुनरागमनसँगै जित हात पारेको थियो। पहिलो सेट १८-२५ ले गुमाएको उसले दोश्रो सेटमा २५-२२ ले खेल आफ्नो पक्षमा पार्दै बराबरी गरेको थियो।

त्यसपछि तेश्रो तथा निर्णायक सेटमा २५-२३ को जित निकाल्दै रामप्रसादले प्रतियोगिताको अन्तिम चारमा आफ्नो स्थान पक्का गरेको हो।

अब अन्तिम दुई प्रवेशका लागि दमकले झापा गाउँपालिकासँग प्रतिस्पर्धा गर्ने छ भने रामप्रसादले बेलबारी र सभापोखरीबीचको विजेतासँग प्रतिस्पर्धा गर्ने छ। सेमिफाइनल र फाईनल खेल भोलि हुनेछ ।

प्रतियोगिताको विजेताले नगद एक लाख प्राप्त गर्ने छ भने उपविजेताले नगद ५० हजार हात पार्ने छ। खेल दमक-३ स्थित प्रस्तावित मदनभण्डारी रंगशालामा संचालन भइरहेको छ।