एजेन्सी । गोलकिपर एमिलियानो मार्टिनेजले तीन पेनाल्टि बिफल बनाएसँगै अर्जेन्टिना कोपा अमेरिका कप फुटबलको फाइनलमा प्रवेश गरेको छ । आज बिहान सम्पन्न खेलमा कोलम्बियालाई टाईब्रेकरमा ३–२ ले हराउँदै अर्जेन्टिना फाइनल प्रवेश गरेको हो ।

निर्धारित र अतिरिक्त समय सम्म एक/एक को बराबरी भएपछि खेल टाइब्रेकर सम्म पुगेको थियो । यद्यपि अर्जेन्टिनाले खेलको सातौं मिनेटमा लौटारो मार्टिनेजको गोलबाट अग्रता लिएको थियो । लियोनल मेस्सीले डिबक्सभित्र उपलब्ध गराएको पासमा मार्टिनेजले शानदार गोल गरेका थिए ।

उता ६१ औं मिनेटमा लुइस डियाजले गोल गर्दै कोलम्बियाले बराबरी गरेको थियो । टाईब्रेकरमा अर्जेन्टिनाका लागि लियोनल मेस्सी, लौटारो मार्टिनेज र पेरेडेसले गोल गरेका थिए भने रोड्रिगो डी पाउलको प्रहार बाहिरीएको थियो ।

कोलम्बियाका जुआन काउड्राडो र मिगुएल बोरजाको प्रहारले मात्र जाली चुम्यो । डेभिन्सन साञ्चेज, यारी मिना र इडविन कार्डोनाको प्रहार गोलकिपर मार्टिनेजले बिफल बनाइदिएका थिए । जितसँगै अर्जेन्टिनाले उपाधिका लागि ब्राजिलसँगको भेट पक्का गरेको छ ।

सन् २०१६ पछि पहिलो पटक अर्जेन्टिना कोपा अमेरिकाको फाइनल पुगेको हो । अर्जेन्टिनाले १४ वर्षपछि पहिलो पटक ब्राजिलसंग फाइनल खेल्न लागेको हो ।