फाक्तेप। धरान सिटी एफसी झापाको शिवसताक्षी-७ फाक्तेपमा जारी प्रथम एनी फाक्तेप गोल्डकपको फाइनलमा प्रवेश गरेको छ। उसले मोरङको पथरी एफसीलाई २-१ गोल अन्तरले पराजित गर्दै फाइनल यात्रा तय गरेको हो।

विजयी टिमका लागि जर्सी नम्बर १० का मन्दिप राई र जर्सी नम्बर १६ का विबेक राईले गोल गरे । पराजित पथरीका लागि जर्सी नम्बर १० का सनम भुजेलले गोल गरेका थिए।

यद्यपि खेलमा अग्रता भने पथरीले खेलको २४ औं मिनेटमा लिएको थियो। पथरीका सनम भुजेलले हेड मार्फत दर्शनीय गोल गरेका थिए।

तर त्यसको ८ मिनेट पनि बित्न नपाउँदै धरानका मंदिपले बराबरी गोल फर्काए। बराबरी गरेसँगै केहि आक्रामक देखिएको धरानका लागि विबेकले ६८ औं मिनेटमा बर्तमान राईको फ्रि-किकमा शानदार हेड गेल गर्दै अग्रता दिलाए। त्यसपछि दुबै टिमबाट गोल हुन सकेन र खेलमा धरानले बाजी मार्यो। खेलको म्यान अफ दि म्याच धरानका विबेक राई भए।

बिहीबार अन्तिम दुई प्रवेशका लागि जलथल एफसी जलथल र तुर्केनी एफसी काँकडभिट्टा आमनेसामने हुनेछन्। प्रतियोगिताको विजेताले नगद एक लाख एक हजार हात पार्ने छ भने उपविजेताले नगद एकाउन्न हजार प्राप्त गर्ने छ।