दमक। झापाको दमकमा जारी प्रदेश स्तरीय खुल्ला बुद्धिचाल प्रतियोगितामा क्यान्डिडेट मास्टर कृष्ण थापाले एकल अग्रता लिएका छन्।

तेश्रो राउण्डमा दमकका बसन्त लामालाई चित ख्वाएका उनले चौथो राउण्डमा पुरुषोत्तम सिलवाललाई माथ दिँदै एकल अग्रता लिएका हुन्।

उनको ४ अंक छ। उनलाई अन्य चार खेलाडीले ३.५ अंकका साथ पच्छ्याइरहेका छन्। समान ३.५ अंक हुनेहरुमा फोडे मास्टर मनिष हमाल, दमकका राजन सुबेदी, दमककै प्रकाश चन्द्र नेपाल र प्रेम लिम्बु छन्।

त्यस्तै अर्का फिडे मास्टर रुपेश जैसवालको ३ अंक छ। उनी तेश्रो राउण्डमा पुरुषोत्तम सिलवालसँग पराजित भएका थिए। २५ गते सम्म चल्ने प्रतियोगितामा ५० खेलाडीको सहभागिता रहेको छ। विजेताले २१ हजार प्राप्त गर्ने सो प्रतियोगिताको कुल पुरस्कार राशि एक लाख ८० रहेको छ।

आइतबार पाँचौं राउण्डमा शिर्ष स्थानका कृष्ण थापाले फिडे मास्टर मनिष हमालको सामना गर्ने छन्। थापाले सेतोबाट खेल्ने छन् । आइतबार पनि दुई राउण्ड खेल हुने चिफ आर्बिटर भुपेन्द्र निरौला निरजले जानकारी दिनुभयो।