दमक। झापाको दमकमा सम्पन्न प्रदेश स्तरीय प्रथम वडा अध्यक्ष कप अन्तर पालिका भलिबल प्रतियोगिताको उपाधि झापा गाउँपालिकाले जितेको छ। उसले भोजपुरको रामप्रसाद राई गाउँपालिकामाथि शानदार जित निकाल्दै उपाधि कब्जा गरेको हो।

झापाले भोजपुरमाथि सोझो सेटमा जित हासिल गरेको हो। पहिलो सेटमा २५-२१ ले जित हात पारेको झापाले दोश्रो सेटमा २५-१४ को शानदार जीत हासिल गरेको थियो। त्यसपछि तेश्रो सेटमा पनि झापाले उत्कृष्ट प्रदर्शन गर्दै २५-१८ को फराकिलो अन्तरमा जीत निकाल्दै उपाधिमाथि कब्जा जमाएको थियो। जितसँगै झापाले नगद एक लाख हात पारेको छ भने उपविजेता भोजपुरले ५० हजार प्राप्त गर्यो।

प्रतियोगिताको सर्वोत्कृष्ट खेलाडीको उपाधि झापाका जर्सी नम्बर ६ का रविन शिवाकोटीले हात पारे । त्यस्तै वेष्ट सेटर बेलबारीका जर्सी नम्बर ६ का पदम राज खड्काले हात पार्दा वेष्ट स्पाइकरको उपाधि भोजपुरका जर्सी नम्बर ४ का दिनेश तामाङले हात पारे भने वेष्ट ब्लकरको उपाधि झापाका जर्सी नम्बर ८ का रोहित शिवाकोटीले हात पारे ।

त्यस्तै वेष्ट सर्भरको उपाधि दमकका मुस्कान लिम्बुले हात पार्दा वेष्ट लिब्रोको उपाधि झापाकै जर्सी नम्बर १२ का गणेश कटुवालले प्राप्त गरे । दमक -३ स्थित प्रस्तावित मदनभण्डारी रंगशालामा सम्पन्न प्रतियोगितामा प्रदेश १ का १९ पालिकाको सहभागिता रहेको खेल संयोजक राजु श्रेष्ठले जानकारी दिनु भयो।