दमक। झापाको दमकमा सम्पन्न प्रथम शान्ताकला गुरुङ स्मृति कप डबल ब्याडमिन्टन प्रतियोगिताको उपाधि इटहरीका  श्याम लामा र पूर्ण बुढाको जोडीले जितेको छ।

लामा र बुढाको जोडीले झापाको कमल गाउँपालिकाका अभिषेक राई र घनश्याम खनालको जोडीमाथी शानदार जित हासिल गर्दै उपाधि जितेको हो। पहिलो सेटमा २१-१० को फराकिलो जित निकालेको सो जोडीले दोश्रो सेटमा पनि शानदार प्रदर्शन गरेको थियो।

इटहरीका पूर्ण बुढाको शसक्त प्रहार सामु राई र खनालको जोडी दोश्रो सेटमा धेरै टिक्न सकेन् । दोश्रो सेटमा राई र खनालको जोडीले २१-७ को लज्जास्पद हार खायो।  जितसँगै लामा र बुढाको जोडीले नगद २० हजारसँगै ट्रफी हात पार्यो ।

त्यस्तै उपविजेता राई र खनालको जोडीले नगद १० हजार प्राप्त गर्यो। प्रतियोगितामा झापा, मोरङ, सुनसरी र पाँचथरका गरी ३२ टिमको सहभागिता रहेको थियो। प्रतियोगिताको आयोजना सौजन्य ब्याडमिन्टन कोर्टले गरेको थियो।